follow us:
మూడు టీ20ల సిరీస్ లో భాగంగా హార్దిక్ పాండ్యా నేతృత్వంలోని భారత జట్టు, న్యూజిలాండ్ తో తలపడతున్న సంగతి తెలిసిందే. ఇప్పటికే తొలి టీ20 వర్షం కారణంగా రద్దవడంతో, ఇప్పుడు అందరి కళ్లు మౌంట్ మౌంగ‌నుయి వేదికగా జరగాల్సిన రెండో టీ20పై పడ్డాయి. సిరీస్ లో పైచేయి సాధించాలంటే ఈ మ్యాచులో విజయం సాధించడం ఇరు జట్లకు కీలకం. దీంతో ఈ మ్యాచులో విజయం ఎవరిని వరించనుంది? ఇరు జట్ల బలాబలాలు ఎలా ఉన్నాయన్నది ఇప్పుడు చూద్దాం..
భారత జట్టు బలం బ్యాటింగ్. ఈ మ్యాచులో ఇండియా రోహిత్ శర్మ, విరాట్ కోహ్లి, కేఎల్ రాహుల్, బుమ్రా, షమీ, డీకే వంటి సీనియర్లు లేకుండా బరిలోకి దిగుతోంది. అయినప్పటికీ హార్దిక్ పాండ్యా నాయకత్వంలో భారత్ జట్టు పటిష్టంగా ఉంది. సూర్యకుమార్ యాదవ్ ఎలాగూ మంచి ఫామ్ లోనే ఉన్నాడు. అతనికి మరో ఎండ్ నుంచి సహకారం అందిస్తే చెలరేగడం పక్కా. మరోవైపు శుభ్ మాన్ గిల్, సంజూ శాంసన్, ఇషాన్ కిషన్, దీపక్ హుడా వంటి యువ బ్యాటర్లు తమ సత్తా చాటేందుకు ఉవ్విళ్లూరుతున్నారు. బ్యాటింగ్ లో పటిష్టంగా ఉన్న భారత జట్టు బౌలింగ్ విభాగంలో రాణిస్తే సిరీస్ లో పైచేయి సాధించవచ్చు.
కివీస్.. బ్యాటింగ్, బౌలింగ్ రెండింటిలో బలంగానే ఉంది. ఓపెనర్లు ఫిన్ అలెన్, డెవాన్ కాన్వే కీలకం కానుండగా మిడిల్ ఆర్డర్ లో గ్లెన్ ఫిలిప్స్, డారిల్ మిచెల్, జేమ్స్ నీషమ్ చెలరేగే అవకాశం ఉంది. ఇక బౌలింగ్ విషయానికొస్తే.. ట్రెంట్ బోల్ట్ లేని లోటు స్పష్టంగా కనిపిస్తున్నా మిచెల్ సాంట్నర్, టిమ్ సౌతీ, ఆడమ్ మిల్నే కీలకం కానున్నారు. స్వదేశీ పిచులు కనుక కివీస్ ఆటగాళ్లకు అనుకూలంగా ఉండవచ్చు.
టీ20ల్లో భారత్, న్యూజిలాండ్ జట్లు 22 మ్యాచుల్లో తలపడ్డాయి. ఇందులో భారత్ 11 మ్యాచుల్లో గెలవగా, న్యూజిలాండ్ 9 సార్లు విజయం సాధించింది. మరో రెండు మ్యాచులు రద్దయ్యాయి. అంటే ఇండియాదే కొంచెం పైచేయి.
ఈ మ్యాచ్‌ మౌంట్ మౌంగ‌నుయి వేదికగా జరగనుంది. ఈ వేదికపై మొదట బ్యాటింగ్ చేసిన జట్లే అన్ని మ్యాచుల్లో విజయం సాధించాయి. అయితే.. తొలి టీ20లాగానే ఈ మ్యాచుకు వర్షం ముప్పు పొంచివుంది.
ఇరుజట్ల బలాలు, బలహీనతలు పరిశీలించిన తర్వాత ఈ మ్యాచులో న్యూజిలాండ్ విజయం సాధించే అవకాశం ఎక్కువుగా ఉంది. బ్యాటింగ్‌లో ఇరు జట్లు సమవుజ్జీలుగా ఉన్నా.. బౌలింగ్‌లో కివీస్ కొంత బలంగా కనిపిస్తుంది. అది కాక.. స్వదేశీ పిచులు వారికి అనుకూలంగా ఉండవచ్చు.
భారత జట్టు: శుభమాన్ గిల్, ఇషాన్ కిషన్, సంజు శాంసన్, సూర్యకుమార్ యాదవ్, హార్దిక్ పాండ్యా(కెప్టెన్), రిషబ్ పంత్, దీపక్ హుడా/వాషింగ్టన్ సుందర్, భువనేశ్వర్ కుమార్, యుజ్వేంద్ర చాహల్, అర్షదీప్ సింగ్, ఉమ్రాన్ మాలిక్.
న్యూజిలాండ్ జట్టు: ఫిన్ అలెన్, డెవాన్ కాన్వే, కేన్ విలియమ్సన్(కెప్టెన్), గ్లెన్ ఫిలిప్స్, డారిల్ మిచెల్, జేమ్స్ నీషమ్, మిచెల్ సాంట్నర్, టిమ్ సౌతీ, ఆడమ్ మిల్నే, లాకీ ఫెర్గూసన్, బ్లెయిర్ టిక్నర్.
📸 📸 Snapshots from #TeamIndia‘s traditional welcome at Mt. Maunganui
Image Courtesy: Jamie Troughton/Dscribe Media#NZvIND pic.twitter.com/K4yUiScPO7
— BCCI (@BCCI) November 19, 2022
